Don dawood ibrahim story malayalam

ദാവൂദ് ഭായ് ആരോഗ്യവാനാണെന്നും, പുറത്തുവന്ന വ്യാജവാർത്ത കണ്ട് താൻ ഞെട്ടിപ്പോയെന്നും അടുത്ത അനുയായി ഛോട്ടാ ഷക്കിൽ വ്യക്തമാക്കിയതോടെയാണ് ദാവൂദ് ആശുപത്രിയിലാണെന്ന വാർത്തകൾക്ക് വിരാമമായത്.

വ്യാജവാര്‍ത്ത കണ്ട് ഞാന്‍ ഞെട്ടിപ്പോയി. കഴിഞ്ഞ ദിവസം കൂടി അദ്ദേഹത്തെ ഞാന്‍ കണ്ടിരുന്നുവെന്നാണ് ഛോട്ടാ ഷക്കിൽ വ്യക്തമാക്കിയത്. വിഷം ഉള്ളിൽച്ചെന്ന നിലയിൽ ദാവൂദിനെ കറാച്ചിയിലെ ആശുപത്രിയിൽ പ്രവേശിപ്പിച്ചെന്ന റിപ്പോർട്ടുകളാണ് പുറത്തുവന്നത്. ദാവൂദിന് എന്തു സംഭവിച്ചുവെന്ന വിവരങ്ങൾ തേടാൻ മുംബൈ പോലീസ് ശ്രമം ആരംഭിച്ചിരുന്നു. ദാവൂദിൻ്റെ അടുത്ത ബന്ധുക്കളായ അലി ഷാ പാർക്കറുമായും, സാജിദ് വാഗ്ലെയുമായും ബന്ധപ്പെട്ട് വിവരങ്ങൾ ശേഖരിക്കാൻ മുംബൈ പോലീസ് നീക്കം ആരംഭിച്ചതായുള്ള സ്ഥിരീകരിക്കാത്ത വാർത്തകൾ പുറത്തുവന്നു.

എന്നാൽ ഛോട്ടാ ഷക്കിൽ നടത്തിയ വെളിപ്പെടുത്തലോടെ ഈ വാർത്തകൾക്ക് വിരാമമായി.

രാജ്യത്തെ ഞെട്ടിച്ച മുംബൈ സ്‌ഫോടനത്തിന്റെ മുഖ്യസൂത്രധാരനായ ദാവൂദ് പാകിസ്താനിലുണ്ടെന്ന് ഇന്ത്യ പലതവണ വ്യക്തമാക്കിയിരുന്നുവെങ്കിലും പാക് സർക്കാരും സൈന്യവും നിഷേധിച്ചു. സൈന്യത്തിൻ്റെ കാവലിൽ ദാവൂദ് കറാച്ചിയിലെ വീട്ടിൽ സുരക്ഷിതനായി കഴിയുന്നുവെന്നായിരുന്നു ഇന്ത്യയുടെ ആരോപണം.

പതിറ്റാണ്ടുകളായി ദാവൂദ് ഇബ്രാഹിമിനെ പാകിസ്താനിൽ നിന്ന് വിട്ടുകിട്ടണമെന്ന് ഇന്ത്യ ആവശ്യപ്പെട്ടിരുന്നു. ദാവൂദ് നടത്തിയ ഇടപെടലുകളുടെ നിരവധി തെളിവുകൾ നൽകിയെങ്കിലും എല്ലാ പാകിസ്താൻ നിഷേധിച്ചു. കറാച്ചിയിലെ അബ്ദുള്ള ഖാസി ബാബ ദർഗയ്ക്ക് സമീപത്തെ പ്രതിരോധ മേഖലയിലാണ് ദൂവൂദ് കുടുംബത്തിനൊപ്പം താമസിക്കുന്നതെന്ന് സഹോദരി ഹസീന പാർക്കറുടെ മകൻ അലി ഷാ പാർക്കർ മുൻപ് വെളിപ്പെടുത്തിയിരുന്നു.

ദേശീയ അന്വേഷണ ഏജൻസിയോടാണ് ദാവൂദിൻ്റെ സഹോദരിപുത്രൻ ഇക്കാര്യം വ്യക്തമാക്കിയത്.

പാക് രഹസ്യാന്വേഷണ ഏജൻസിയായ ഐഎസ്‌ഐയുമായും, ഭീകര സംഘടനയായ ലഷ്‌കർ-ഇ-തൊയ്ബയുമായും ദാവൂദിന് അടുത്ത ബന്ധമുള്ള ദാവൂദിൻ്റെ തലയ്ക്ക് 25 മില്യൺ ഡോളറാണ് ഇന്ത്യയിട്ടിരിക്കുന്ന വില.

അൽ-ഖ്വയ്ദയുമായുള്ള ബന്ധത്തിന്റെ പേരിൽ യുഎൻ സെക്യൂരിറ്റി കൗൺസിലും അമേരിക്കയും 67കാരനായ ദാവൂദിനെ ഭീകരനായി പ്രഖ്യാപിച്ചിരുന്നു. 2003ലാണ് അമേരിക്ക ദാവൂദിനെ ആഗോള ഭീകരരുടെ പട്ടികയിൽ ഉൾപ്പെടുത്തിയത്. കണ്ടെത്താനുള്ള ശ്രമങ്ങൾ പരാജയപ്പെട്ടതോടെ ഫോർബ്‌സിന്റെ ലോകത്തിലെ 10 മോസ്റ്റ് വാണ്ടഡ് പട്ടികയിൽ ദാവൂദിനെ ഉൾപ്പെടുത്തിയിരുന്നു.

260ഓളം പേർ കൊല്ലപ്പെടുകയും 700ലധികം പേർക്ക് പരിക്കേൽക്കുകയും ചെയ്ത 1993ലെ മുംബൈ സ്‌ഫോടനത്തിന് പിന്നാലെ പാകിസ്താനിലേക്ക് കടന്ന ദാവൂദ് അവിടെ സുരക്ഷിതനാണ്. ദാവൂദിനെ സംരക്ഷിക്കാൻ പാക് സൈന്യവും സർക്കാരും തീരുമാനിച്ചതിന് പിന്നിൽ നിരവധി കാരണങ്ങളുണ്ട്.

മറ്റ് സംഘങ്ങളിൽ നിന്നും ഇന്ത്യൻ സുരക്ഷാ ഏജൻസികളിൽ നിന്നും സംരക്ഷണം നൽകിയപ്പോൾ പ്രതിഫലമായി ഇന്ത്യയിലെ വിവരങ്ങൾ ദാവൂദ് ഐഎസ്‌ഐയ്ക്ക് കൈമാറിയെന്ന ഗുരുതരമായ ആരോപണം നിലവിലുണ്ട്. ഇന്ത്യയിലെ ഉന്നതരുമായുള്ള ബന്ധവും, വിവിധ സംഘങ്ങളുമായുള്ള അടുപ്പത്തിലൂടെയും ശേഖരിക്കുന്ന വിവരങ്ങൾ ആദ്യ ഘട്ടങ്ങളിൽ ദാവൂദ് കൈമാറുകയായിരുന്നു.

ദാവൂദിൻ്റെ നിയന്ത്രണത്തിലുള്ള ഡി കമ്പനിവഴി ഐഎസ്‌ഐ വിവരങ്ങൾ ശേഖരിച്ചു. ഐഎസ്‌ഐ ദാവൂദിന് സംരക്ഷണം നൽകുന്നതായി 2013ൽ ലഷ്‌കർ ഇ ത്വയ്യബ ഭീകരൻ അബ്ദുൾ കരീം തുണ്ട വെളിപ്പെടുത്തിയിരുന്നു. ലോകത്തെ ഞെട്ടിച്ച 2001 സെപ്റ്റംബർ 11ലെ ആക്രമണംവരെ ദാവൂദിനെ പലരീതിയിൽ ഉപയോഗിച്ചിരുന്നതായി റിപ്പോർട്ടുകൾ പുറത്തുവന്നിരുന്നു.

മുംബൈ സ്‌ഫോടനത്തിന് പിന്നാലെ രാജ്യംവിട്ട ദാവൂദിൻ്റെ മുംബൈ ആസ്ഥാനമായി പ്രവർത്തിച്ച ഡി കമ്പനിയുടെ പ്രവർത്തനം പൂർണമായി അവസാനിച്ച നിലയിലാണ്. മയക്കുമരുന്ന് കടത്ത്, കള്ളപ്പണം വെളുപ്പിക്കൽ, കൊള്ളയടിക്കൽ, ആയുധക്കടത്ത്, കൊലപാതകം, ക്വട്ടേഷൻ തുടങ്ങിയ പ്രവർത്തനങ്ങളിൽ സജീവമായിരുന്ന ഡി കമ്പനിയുടെ പ്രവർത്തനങ്ങളും നെറ്റ് വർക്കുകളുമെല്ലാം ഇന്ന് തകർക്കപ്പെട്ടു.

ഡി കമ്പനിയെ മുംബൈ പോലീസ് ഏറെക്കുറെ തുടച്ചു നീക്കി.

ദാവൂദ് ആരുമായും ബന്ധം പുലർത്താറില്ലെന്ന് എൻഐഎയ്ക്ക് നൽകിയ മൊഴിയിൽ സഹോദരി പുത്രൻ അലി ഷാ പാർക്കർ പറഞ്ഞെങ്കിലും പാകിസ്താനിൽ എത്തിയ ശേഷം ദാവൂദ് വീണ്ടും വിവാഹം ചെയ്തതായി അദ്ദേഹം വ്യക്തമാക്കുന്നുണ്ട്. ദാവൂദ് - മയ്സാബിൻ ദമ്പതികൾക്ക് മഹ്രൂഖ്, മെഹ്റിൻ, മസിയ എന്നീ മൂന്ന് പെൺമക്കളും മോഹിൻ നവാസ് എന്ന മകനുമാണുള്ളത്.

പാകിസ്ഥാൻ ക്രിക്കറ്റിലെ മുൻതാരം ജാവേദ് മിയാൻദാദിന്റെ മകൻ ജുനൈദാണ് മഹ്രൂഖിന്റെ ഭര്‍ത്താവ്. അനന്തരവൻ ഒരു മുതിർന്ന ഐഎസ്‌ഐ ഏജന്റിന്റെ മകളെ വിവാഹം ചെയ്തതായും റിപ്പോർട്ടുണ്ട്. ദാവൂദ് കറാച്ചി, ദുബായ്, ലണ്ടൻ എന്നിവിടങ്ങളിലെ റിയൽ എസ്റ്റേറ്റ്, ഹോസ്പിറ്റാലിറ്റി തുടങ്ങിയ മേഖലകളിൽ തന്റെ അനധികൃത സമ്പാദ്യം ഇൻവെസ്റ്റ് ചെയ്യുകയും ചെയ്തു.

പാക് സൈന്യത്തിൻ്റെ മുഴുവൻ സമയ സംരക്ഷണതയിൽ ദാവൂദ് എന്നും സുരക്ഷിതനായിരുന്നു.

പാകിസ്താനിൽ സർക്കാരുകൾ മാറിമാറി വന്നെങ്കിലും ദാവൂദിനെ തൊടാൻ ഒരു സർക്കാരിനും ധൈര്യമുണ്ടായിരുന്നില്ല. ദാവൂദ് രാജ്യത്തില്ലെന്ന് സർക്കാരുകൾ ആവർത്തിച്ചു പറഞ്ഞു. ഇന്ത്യക്കെതിരെ ഉപയോഗിക്കാനുള്ള ആയുധമായിട്ടാണ് പലപ്പോഴും ദാവൂദിനെ അവർ കണ്ടത്. ഈ സാഹചര്യത്തിൽ ദാവൂദിന് എന്തുസംഭവിച്ചാലും അത് രഹസ്യമാക്കി വെക്കാനാകും പാക് സർക്കാർ ശ്രമിക്കുക.

ദാവൂദ് ഇബ്രാഹിമിനെ കൊലപ്പെടുത്താനുള്ള ശ്രമമുണ്ടായത് ഛോട്ടാ രാജന്റെ ഭാഗത്തുനിന്നാണ്.

1998ൽ ദാവൂദ് ഇബ്രാഹിമിനെ കൊലപ്പെടുത്താൻ ഛോട്ടാ രാജന്റെ അടുത്ത സഹായികൾ പദ്ധതിയിട്ടിരുന്നെങ്കിലും നീക്കം പരാജയപ്പെടുകയായിരുന്നുവെന്ന് സംഘത്തിലുണ്ടായിരുന്ന ഇജാസ് ലക്‌ഡാവാല മുംബൈ പോലീസിനോട് വ്യക്തമാക്കിയിരുന്നു. ദാവൂദ് ഇബ്രാഹിമിന്റെ അടുത്ത സഹായിയുമായിരുന്ന ലക്‌ഡവാലയെ മുംബൈ ക്രൈംബ്രാഞ്ച് അറസ്റ്റ് ചെയ്തു. തുടർന്ന് നടത്തിയ ചോദ്യം ചെയ്യലിലാണ് ഇക്കാര്യം വെളിപ്പെടുത്തിയത്.

ദാവൂദിനെ കൊല്ലാനുള്ള ശ്രമം പരാജയപ്പെട്ടതോടെ ഛോട്ടാ ഷക്കീലിന്റെ സഹായികൾ തന്നെയും ഛോട്ടാ രാജനെയും ആക്രമിച്ചതായി ലക്‌ഡവാല പോലീസിനോട് വ്യക്തമാക്കിയിരുന്നു.

ഛോട്ടാ രാജന്റെ അടുത്ത സഹായികളും ഇന്ത്യൻ ഏജൻസികളും ചേർന്ന് 1998ൽ കറാച്ചിയിൽ വെച്ച് ദാവൂദ് ഇബ്രാഹിമിനെ വധിക്കാൻ പദ്ധതിയിട്ടെങ്കിലും നീക്കം പാളിയതായി ക്രൈംബ്രാഞ്ച് വൃത്തങ്ങൾ സൂചിപ്പിക്കുന്നുണ്ട്.

വിക്കി മൽഹോത്ര, ഫരീദ് തനാഷ, ബാലു ഡോക്രെ, ലക്‌ഡാവാല, വിനോദ് മത്കർ, സഞ്ജയ് ഘാട്ടെ, ബാബ റെഡ്ഡി എന്നിവരടങ്ങുന്ന സംഘമാണ് കറാച്ചിയിലെ ഒരു ദർഗയിൽ വെച്ച് ദാവൂദിനെ വധിക്കാനുള്ള ശ്രമം നടത്തിയത്. ഈ നീക്കം പരാജയപ്പെട്ടതോടെ സംഘത്തിലുണ്ടായിരുന്നവർക്ക് ദാവൂദിൽ നിന്നും കറാച്ചി പോലീസിൽ നിന്നും പലവിധത്തിലുള്ള തിരിച്ചടിയുണ്ടായി. ഇത്തരത്തിൽ തോക്കിന് മുന്നിൽ നിന്ന് പലതവണ രക്ഷപ്പെട്ട ദാവൂദ് പിന്നീട് പാക് സൈന്യത്തിൻ്റെയും സർക്കാരിൻ്റെയും കീഴിൽ സുരക്ഷിതനാകുകയായിരുന്നു.